yandex
მოგონებები
 
 
  საქართველოს კათოლიკოს-პატრიარქი ილია II: ”უფალი ისმენს მამა გაბრიელის ლოცვას”


სრულიად საქართველოს კათოლიკოს-პატრიარქმა, უწმიდესმა და უნეტარესმა ილია II-მ 2012 წ. 10 აგვისტოს პანაშვიდი გადაუხადა არქიმანდრიტ გაბრიელს, ქართული საბერ-მონოზვნო სკოლის ღირსეულ წარმომადგენელს, რომელსაც ერი სიყვარულით უხმობს - ბერი გაბრიელი.

        სახელითა მამისათა და ძისათა და სულისა წმიდისათა.
        მოგეხსენებათ, რომ არსებობს სულთა კავშირი - კავშირი ზეცასა და ქვეყანას შორის და ეს კავშირი ხშირად მოგვიწოდებს სულიერი მოღვაწეობისაკენ, რაღაც საქმისაკენ. მე მახსენდება აწ გარდაცვლილი ალექსანდრიის პატრიარქის, ნოკოლოზის ჩამოსვლა საქართველოში. ჩვენ ერთად ვიყავით დარიალის ხეობაში, საზღვარზე და მე ვუთხარი მას: ”დამილოცე საზღვრები მეთქი”. მან დალოცა საზღვრები და თქვა: ”საქართველოს იმდენი წმიდანი იცავს, იმდენი თავდადებული მოღვაწე და მოწამე, რომ ვერავითარი მტერი ვერ დაარღვევს საქართველოს საზღვრებსო”.
        დღეს, როცა ბევრი პრობლემა და სიმძიმე დააწვა საქართველოს და ჩვენ გვიჭირს აფხაზეთში და ცხინვალში შესვლა, შევთხოვოთ ჩვენს წინაპრებს: მეფეებს, პატრიარქებს, დედოფლებს, თავდადებულ ადამიანებს, მათ სულებს, რომ დაგვეხმარონ და დაიცვან სამშობლო. როგორადაც ჩვენია სამშობლო, ისე იმათია. და დღეს სულმა მომთხოვა, რომ ჩამოვსულიყავი ამ წმიდა მონასტერში და პანაშვიდი შემესრულებინა მამა გაბრიელის საფლავზე. მამა გაბრიელს მე კარგად ვიცნობდი ჩემი სტუდენტობიდან. ის იყო განსაკუთრებული მოღვაწე და ბევრს არც ესმოდა მისი. ზოგიერთ შემთხვევაში სალოსიც იყო, და ამასთან ერთად - დიდი სულიერი მოღვაწეც. და უფალი ისმენდა და ისმენს მის ლოცვას... ვილოცოთ მისთვის, ჩვენი წინაპრებისთვის და მთელი საქართველოსთვის. ჩვენთან არს ღმერთი.

        ილია II
        სრულიად საქართველოს კათოლიკოს-პატრიარქი




მიტროპოლიტი დანიელი (დათუაშვილი)
მამა გაბრიელს სამთავროს წმ. ნინოს დედათა მონასტერში მსახურებისას დავუახლოვდი. ის საქართველოს კათოლიკოს-პატრიარქის, უწმიდესის და უნეტარესის ილია II შემდეგ ყველაზე დიდი ავტორიტეტი იყო ჩემთვის. იგი არა მხოლოდ ქართველი ერის კუთვნილებაა, არამედ ყველა მათი, რომელთაც ოდესმე უნახავთ... ვისაც მამა გაბრიელი უყვარს, ის ყველა ღვთისშვილია

მიტროპოლიტი სერგი (ჩეკურიშვილი)
როცა მისი გარდაცვალების შემდეგ ამდენი სასწაული ხდება, ვფიქრობ, რომ ეს არის დიდი სიწმინდის მიზეზი. ამდენად, ის არის წმინდანი ბერი.

მთავარეპისკოპოსი თადეოზი (იორამაშვილი)
მამა გაბრიელი ბრძანდებოდა ჩვენი საშინელი, მკაცრი, დამძიმებული და უსიყვარულო სამყაროს ღვთიური სასწაული. იგი გვაგონებს მადლით თავის მფარველ ანგელოზ გაბრიელს და გაბრიელ მთაწმინდელს. მამა გაბრიელი ყოვლად ბრძნად დაბადებული, ზოგჯერ თავს გვაჩვენებდა სულელად.

იერუსალიმის იოანე ნათლისმცემლის დედათა მონასტრის იღუმენია გეორგია
თქვენ ჭეშმარიტი ”სტარეცი” გყავთ. სამოთხეში ხართ.

ათონის მთის ქსეროპოტამოს მონასტრის წინამძღვარი სტილეანოსი
ასეთი დიდი ბერი ჩვენთანაც კი არ არის.

არქიმანდრიტი ტიმოთე, ოროპოსის სულიწმინდის სახ.მონასტრის წინამძღვარი, საბერძნეთი
მოხარულები ვართ, რომ ბოლო საუკუნეების მანძილზეც არიან ასეთი წმინდა ადამიანები, რომლებიც უშურველად ემსახურებიან ხალხს. მისი კანონიზირება საშური საქმეა.

სქემარქიმანდრიტი ვიტალი (სიდორენკო)
ბერი გაბრიელი უდიდესი ბერია

არქიმანდრიტი ეფრემი (რუსეთი)
გაბრიელ ბერი იყო თავისი ერის ცხოვრებაში განსაკუთრებული მისსიისა და უმძიმესი ღვაწლის მქონე დიდი წინასწარმეტყველი, რომლის მეოხებითაც ბრძენ ქართველ ერს ბოლო დროის დიდი სულიერი საიდუმლოება გაეხსნება.

მთავარეპისკოპოსი იოსები (კიკვაძე)
მე ის უფრო გამიკვირდება, რომ მამა გაბრიელი არ იყოს წმიდანი.

მთავარეპისკოპოსი სერაფიმე (ჯოჯუა)
მამა გაბრიელთან შეხვედრის პირველივე დღიდან ვგრძნობდი, რომ ის ჩვეულებრივი ადამიანი არ იყო. ადამიანთა გულის საიდუმლოებების ცნობის ნიჭი, რომელიც ღვთისგან ჰქონდა მიმადლებული, ჩემში კიდევ უფრო განამტკიცებდა იმ შეხედულებას, რომ ის ძალიან დიდი ბერი იყო. მისი ყოველი სიტყვა, ღიმილი თუ მრისხანებაც კი, ღმერთის სიყვარულით იყო დატვირთული. მასში საქართველოსა და ჩვენი ერის დიდი სიყვარული იგრძნობოდა. მამა იოანესა და მამა გიორგიზე (ბეთანიელებზე) მეუბნებოდა, უხრწნელნი არიან მიწაშიო. მახსოვს უხერხულ კითხვაზე ჩემი გულწრფელი პასუხით გახარებულმა მოფერებით მითხრა, მიყვარს უბრალო ბერებიო. მამა გაბრიელი ფიზიკურად დღესაც ჩვენთან რომ იყოს, მეტად დავეკითხებოდი და დავაფასებდი მას.

მოწამეთას მონასტრის წინამძღვარი არქიმანდრიტი თორნიკე
გაბრიელ ბერი იყო ძალიან ძლიერი პიროვნება. უაღრესად თავმდაბალი და ღმრთისმოშიში, დიდი სულიერების მქონე მოღვაწე. ჩემი ცხოვრების 86 წლის მანძილზე მრავალი მწუხარება და სიხარული განმიცდია. ერთ-ერთი დიდი სიხარული განვიცადე, როდესაც სან-ფრანცისკოში მართლმადიდებლურ მონასტერში ყოფნისას ჟურნალში ამოვიკითხე ჩვენი დიდი ბეთანიელი მამების - იოანესა (მაისურაძე) და გიორგის (მხეიძე) დიდ ბერულ ღვაწლზე, მამა გაბრიელზე კი ასეთი რამ ეწერა: საქართველოში არც კი იციან, თუ რა დიდი ბერი ჰყავთ მათ მონასტერში. ჩვენთანაც რომ აღიარონ, განა საუკუნეები უნდა გავიდეს?

ბერი ტიხონი (ბოგოლუბოვი) რუსეთი
არქიმანდრიტი გაბრიელი ქართველ ბერ-მონოზონთა და ნეტარ სალოსთა დასის ერთ-ერთი უბრწყინვალესი წარმომადგენელია, რომელმაც ქართველ წმინდანთა უწყვეტი ჯაჭვის გაგრძელება ბოლო ჟამის შეუდარებლად მძიმე პირობებშიც ღირსეულად შესძლო.

იღუმენი ფილარეტი (გუდინოვი)
მამა გაბრიელი იყო დიდი სასწაულთმოქმედი ბერი. ის იყო ჭეშმარიტების უშიშარი აღმსარებელი.

ბერი პეტრე (შარაშენიძე)
საოცარი სიყვარულისა და თავმდაბლობის მქონე წინასწარმეტყველი და ნათელმხილველი სალოსი მამა გაბრიელი ჭეშმარიტი ბერობის დიდი მოძღვარი იყო. მატერიას, დროსა და სივრცეს - სამყაროს ფლობდა. ბედნიერებაა, რომ ვიცნობდი მას. ის უდიდესი ავტორიტეტი იყო და არის დღესაც ჩემთვის.

რომანოს სამსონოვი (რუსეთი)
უკანასკნელი უღმრთო ათწლეულების მანძილზე ბერი გაბრიელი რჩებოდა ურყევ სვეტად ჭეშმარიტი სარწმუნოებისა.

ნიკოლოზ ვენალუსოვი
მამა გაბრიელის სალოსობა შეშურდებოდა სალოსობის ისეთი უმდიდრესი ტრადიციების მქონე ქვეყანასაც კი, როგორიც მართლმადიდებლური რუსეთია.

მონოზონი მარიამი
მამა გაბრიელმა ყველაზე ყველაფერი იცოდა. ადამიანს რენდგენივით აშუქებდა. მან ჩემს შესახებ უფრო მეტი იცოდა, ვიდრე თავათ მე. ის ყოველთვის მართალი გახლდათ. სალოსობის დროს ვერ ვაცნობიერებდი, თუ რას ნიშნავდა მისი საქციელი, ან სიტყვა. მის ჭეშმარიტ აზრს მხოლოდ შემდგომ ვხვდებოდი. ნამდვილად დიდი ბერი იყო.

მონოზონი ანგელინა
მამა გაბრიელი ძალიან დიდი ბერი იყო. ჭეშმარიტი ღვთისმეტყველი და წინასწარმეტყველი. უბრალო კაცივით ცხოვრობდა. განიკითხავდნენ, ის კი სულგრძელად ითმენდა და სიყვარულით პასუხობდა.

მონოზონი მართა. ბიწმენდის ამაღლების დედათა მონასტერი.
მამა გაბრიელის სიტყვის ძალისა და წინასწარმეტყველების ყოველთვის მწამდა. მანვე მიწინასწარმეტყველა მონოზვნობა, სახელიც კი მისი სიტყვისამებრ მერგო. თხოვნას ყოველთვის მისრულებდა. ერთხელ უკვე ამ ქვეყნიდან გასულს შეწევნა ვთხოვე. მანაც არ დააყოვნა - გამომეცხადა, ტომარა დამიტოვა და გაუჩინარდა. მისი საფლავის ზეთის სასწაულთმოქმედებაშიც არაერთხელ დავრწმუნდი.

თელეთის წმ. გიორგის მონასტრის იღუმენი ამბროსი
მამა გაბრიელი იყო დიდი წმიდა ბერი, მეოცე საუკუნის დიდი მასწავლებელი. უსაზღვრო სიყვარულისა და ტანჯვის მატარებელი. იმდენად დიდია მისი ღვაწლი, რომ მას მთელი საქართველო უნდა ეთაყვანებოდეს. ეთაყვანება კიდევაც გარდა მათი, ვისას ეშინია ანდა შურს მისი.

იღუმენი ელისე (ბელქანია)
XX საუკუნემ არ იცის მასზე დიდი ბერი

იღუმენია ელისაბედი, ფოკის დედათა მონასტერი
დარწმუნებული ვარ, რომ მამა გაბრიელი იყო ღმერთშემოსილი ადამიანი, რომელსაც შეეძლო უფალთან საუბარი. ის იყო სულიწმიდის ჭურჭელი. ყველასათვის უდიდესი სიხარული იქნება მისი წმინდანად შერაცხვა.

დეკანოზი იოსები. მთავარანგელოზთა ეკლესიის წინამძღვარი
მამა გაბრიელი იყო დიდი სალოსი და სიმართლის მოყვარე უმძიმესი მოღვაწეობის დიდი ბერი.

დეკანოზი გრიგოლი (გოცირიძე)
მამა გაბრიელი რწმენისა და სიმართლისთვის ნატანჯი უდიდესი სიწმინდისა და სიყვარულის მქონე ბერი იყო.

დეკანოზი პავლე (კოსაჩი)
მამა გაბრიელი იყო ჭეშმარიტი ბერი, რომელმაც მთელი სიცოცხლის მანძილზე უდრტვინველად ატარა დევნა-შევიწროვების უმძიმესი ჯვარი, რითაც დიდი მადლი ჰპოვა ღმრთის წინაშე.

დეკანოზი ექვთიმე (ლეჟავა)
მამა გაბრიელი დიდი მოვლენა იყო ჩვენ ქართულ ეკლესიაში. მისი ცხოვრება და ღვაწლი ბევრისთვის ჭკუის მასწავლებელია.

”ჯვრის მამის” წინამძღვარი იღუმენი ტარიელი
მამა გაბრიელზე რამის თქმა მხოლოდ სულიერებაში წარმატებულებს თუ შეუძლიათ. მე კი მიჭირს ვილაპარაკო ისეთ დიდ მამაზე, როგორიც მამა გაბრიელია... ის იყო ბერი, რომელიც ხედავდა წარსულსა და მომავალს, ადამიანის სულსა და გულს. მე შინაგანად ვგრძნობდი, რომ იგი მხედავდა. ძალიან მიხაროდა და მსიამოვნებდა მასთან ურთიერთობა.

წმ. იოანე ღვთისმეტყველის ტაძრის წინამძღვარი დეკანოზი ლეონტი (ჟვანია)
ბერი გაბრიელი იყო წმიდანი - დიდი სალოსი.

მამა გიორგი (ბასილაძე), მოწამეთას მამათა მონასტრის ღვთისმსახური
გაბრიელ ბერი სულიწმიდის ჭურჭელი იყო. ის ღვთის გამოვლინების იმდენად განსაკუთრებული მოვლენაა, რომ ბოლომდე ამოუცნობი რჩება, არათუ ჩვეულებრივი ადამიანების გონებისათვის, არამედ თანამედროვე წმიდანებისთვისაც. გაბრიელ ბერს დევნიდნენ და დღესაც დევნიან ჭეშმარიტების მოძულენი, მაგრამ ის ღვთის რჩეული იყო და ღვთისგან შერაცხული. რაც შეეხება ამქვეყნიურ კანონიზაციის საკითხს, მას გარკვეული წესები აქვს და ვფიქრობ, ეს დღეც არ არის შორს.