Месяца ОКТЯБРЯ в 20-й день

преподобнаго  Гавриила Самтаврийского

 

На «Господи воззвах» стихиры на 8, глас 6:

О Преподобне! / Яко гора явился еси / утвержден на Камени Жизни / неподвижим ветрами вражиими / и паче снега блистая венцем добродетели /, всея земли Иверския очи возводя / от земных ко горним, / к высоте небесного Царствия, / идеже водворяяся, // поминай нас, Отче Гаврииле! (дважды)

О Преподобне! / От юности твоея поток жизни к Богу направив, / восшумел еси водопады хвалы Его, / и Жизни нетленныя водами землю твою / и окрестныя страны напоил еси, / и ныне нам утешения струи источи, / яко река из рая текущая, / идеже водворяяся, // поминай нас, Отче Гаврииле! (дважды)

О Преподобне! / Возлюбил еси Крест Господень, / темже спелому грозду подобяся, / вда себе в точило скорбей и мучения, / вино благоуханное любве к Богу и людем искапа, / имже веселя души унывающих, / Древа Живота достиже, / идеже водворяяся, // поминай нас, Отче Гаврииле! (дважды)

Ины стихиры от грузинскаго последования, глас 1:

Днесь, вернии, духовно торжествующе в нарочитем празднице преподобнаго отца, и благочестно радующеся, тому тепле возопиим: радуйся, радуйся, святый исповедниче и Христа ради юродиве, преподобне отче наш Гаврииле, радуйся, небесный человече и земный ангеле: радуйся, многих на путь спасения наставивый: радуйся, верным похвало, Грузинстей и Российстей земли утверждение: молися о душах наших.

Радосте соратников и Православия утверждение, избранный служителю Святыя Троицы, ангелов друже, из земныя обители в небесную возшедый, прекрасный цвете райский, в Царствии Небеснем укоренивыйся, умоли Господа окропити росою благодати нас, углебших в соблазнах и бедствиих.

Исполним молитву со свирелию мысленною и восхвалим Христа Бога нашего, Иже яви сицеваго отца и ходатая матери своей – уделоизбранному народу нашему, и хвалебныя молитвы возопиим ему, радости иночестей и величию Картли, чудес источнику и великому помощнику и ходатаю, яко не имамы инаго толикаго среди отец наших.

Проповедал еси покаяние яко Иоанн Креститель, всенощно руце в молитве простирал еси яко пророк Давид, в милосердие и терпение приоблеклся еси, добродетели делателю старче Гаврииле, темже и Спасу нашему Христу угодил еси, и удостоился еси радости непреходящия со всеми святыми вкупе.

Воздают присно хвалу православнии людие божественным твоим добродетелем, богоносне Гаврииле, святости твоей и смирению и милосердию твоему; и мы ныне, ведая милости твоя, прилежно молимся пред образом твоим и просим ходатайства твоего пред Христом Богом да спасемся от бед, верно находящих на ны, и о еже оставитися беззаконием нашим.

Слава: Глас 5

Кия похвалы ти принесем Гаврииле? / Да Царский образ на драхме сердца твоего обрящеши, / постом, бдением и воздержанием е очищаше, / слезами прилежно от скверны греховныя омываше, / темже и явися в тебе всем образ Владыки твоего. / Во всем явился еси подражатель Христов: / укоряем не сопротив вещаше, гоним кротце претерпеваше, / ночи в молитве пребывая, днем люди утешаше. / Наипаче же божественным смирением и любовию лик твой запечатлен. // Моли о нас Спаса, преподобне Отче!

И ныне: Богородичен Догматик Глас 5:

В Чермнем мори, / Неискусобрачныя Невесты образ написася иногда: / тамо Моисей, разделитель воды, / зде же Гавриил, служитель чудесе. / Тогда глубину шествова немокренно Израиль; / ныне же Христа роди безсеменно Дева. / Море по прошествии Израилеве пребысть непроходно; / Непорочная по рождестве Эммануилеве пребысть нетленна. / Сый и прежде Сый, / явлейся яко Человек, / Боже, помилуй нас.

На стиховне, глас 2

Подобен: Доме Евфрафов

Днесь Церковь Картлийская / веселится о чаде своем, / се бо обрет Гавриил / благодать пред Богом, / ходатай явися о нас велий.

Стих: Восхвалятся преподобнии во славе / и возрадуются на ложах своих

Церковь Богу воздвигнув, / Сам себе Владыце храм устроив, / утверди наша мысли, святе, / создатися нам во обители / Троице Единосущней.

Стих: Возношения Божии в гортани их / и мечи обоюдуостры в руках их

Монах быв, / многим поможе, / беден быв, / многи обогати, / моли о нас святе Гаврииле!

Слава:

Боже бессмертне, / даждь нам на враги победу, / утверди в мiре Церковь Твою, / спаси люди Твоя, / молитвами преподобного Гавриила.

И ныне: Богородичен от больших, глас 2

О чудесе новаго всех древних чудес! / Кто бо позна Матерь, без мужа рождшую / и на руку носящую всю тварь Содержащаго; / Божие есть изволение Рождшееся. / Егоже яко Младенца Пречистая, / Твоима рукама носившая, / и матернее дерзновение к Нему имущая, / не престай молящи о чтущих Тя, / ущедрити и спасти души наша.

 

На утрени:

Тропарь (Глас 1, от грузинскаго последования)

Якоже Владыка Христос славу Свою неизглаголанную / сокры,  плотию одеявся, / такоже и ты юродства вретищем / покрыл еси свет Фаворский имже Тя Господь осия / яко исповедника и страдальца, / и пастырь душ явился еси, / отче преподобне Гаврииле, // моли Христа Бога помиловати души наша. 

Слава, и ныне, Богородичен:

Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, / слава Свободившему нас Рождеством Твоим.

 

По 1 стихословии седален, глас 1:

От восток солнца до запад хвально имя Господне / – сице рцем вси, людие, творя память ныне светло / Божия угодника Гавриила преподобнаго, / яко видим добрая дела его, / и прославим Отца нашего, // Иже есть на небесех.

Слава: (от грузинскаго последования)

Знамением крестным и молитвою вражия искушения победив, постом и воздержанием Господеви благоугодил еси: темже чудес приял еси дар, всем исцеления подавая, верою притекающим к раце мощей твоих, Гаврииле преподобне: моли Христа Бога, грехов оставление даровати чтущим любовию святую память твою.

И ныне:

Богородичен: Милостива буди нам, о Владычице, враг бо стрежет нас ужалити, егда в беспечности пребываем, но сокруши его немощную главу.

По 2 стихословии седален, глас 2:

Надеяся на Господа, яко гора Сион / был еси, преподобне Гаврииле: / не подвижися мыслию живый во Иерусалиме, / горы окрест тебе быша, / и вопиял еси унывающим: / «Господь окрест людей Своих // отныне и до века».

Слава: (от грузинскаго последования)

Господь наш Иисус Христос благослови тя на дела велии, разуму человеческому неудобоприемныя, и дарова ти богатую милость в жизни сей временней, а по святой кончине твоей ущедри тя даром со дерзновением ходатайствовати о душах грешных. Приими и ныне малое сие моление наше, с любовию ти приносимое, и теплым предстательством твоим умоли Владыку Христа Бога избавити нас от греха и нечестия.

И ныне:

Богородичен: О Древо дивноплодное, Яблоко Живота вечнаго прозябшее, приосени ны благодатию Твоею, да согласно поем: Радуйся, Владычице; благоухания жизни исполни нас.

 

По полиелее седален, глас 5:

Прежде безбожия воды наидоша на ны, / но Гавриил сопротив им иде, / жаром молитвы и любве иссушая их. / Ныне же ины испытания потопиша ны: / междоусобия и расколы, развращение и теплохладие, / нашествие иноплеменных и исмаильтян. / Но буди ходатай ко Кормчему ковчега Церкве, / да в нем от потопа избавльшеся, // поем помощь твою, Преподобне.

 

Таже степенна, 1-й антифон 4-го гласа.

Прокимен, глас тойже: Честна пред Господем смерть преподобных Его.

Стих: Что воздам Господеви о всех, яже воздаде ми?

Евангелие от Матфея, зачало 43.       Мф 11:27–30

Рече Господь Своим учеником: вся Мне предана суть Oтцем Моим, и никтоже знает Сына, токмо Oтец, ни Oтца кто знает, токмо Сын, и емуже аще волит Сын открыти. Приидите ко Мне вси труждающиися и обремененнии, и Аз упокою вы. Возмите иго Мое на себе, и научитеся от Мене, яко кроток есмь и смирен сердцем, и обрящете покой душам вашим. Иго бо Мое благо, и бремя Мое легко есть.

 

Стихира по Евангелии, глас 6:

Воссия нам от земли сокровище, / преподобне Гаврииле, мощи твоя, / яже радостию облобызающе, / молим, осияй ны, отче, любовию твоею / и озаритися сердцам нашим моли // любовию к Богу и человеком.

 

Канон

Глас 7, егоже краегранесие: Иверския земли винограде напой верных

Песнь 1

Ирмос: Манием Твоим / на земный образ преложися / прежде удоборазливаемое / водное естество, Господи. / Темже немокренно пешешествовав Израиль, / поет Тебе песнь победную.

Иверския земли винограде, напой верных, на похвалу тебе сошедшихся, божественнаго веселия, истрезвляя ны от пиянства уныния и печалей изымая, и радости о Бозе исполняя нас.

Воинство фараоне в воде древле Моисей потопи, ты же, отче Гаврииле, воинство диаволе низрину молитвою ко Законодавцу, сего ради людем путевождь ко спасению показался еси.

Егда пройде Израиль море Чермное, песнь победную Богу воспе, и ны, отче, научаеши не человеком, но Единому Богу славу воздавати, славно бо прославися.

Богородичен: Рожденнаго от Тебе поем, Дево, и Господа нарицаем, но греси наша на ны вопиют. Моли, Мати Божия, да не услышим глас оный: «Отыдите, не вем вас».

 

Ин канон глас 6, от грузинскаго последования:

Ирмос: Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Имея рвение пламенное к вере правей и любовию преумножая ю, святый старче Гаврииле, укажи нам путь доброслужения.

Присным сосудом Святаго Духа яви тя Господь, темже и благоухания твоих молитв яко фимиам добрый присно восходят к Богу.

Яко дано ти от Бога дерзновение ходатаем быти грешников, тако и ныне молю тя, преподобне, спасти душу мою от греховнаго порабощения.

Невечерним светом блистаеши, отче наш, всеблаженне чудотворче Гаврииле, Божией силою преисполненный, темже моления наша приими и мир даруй с верою притекающим ко святому образу твоему.

Богородичен: Всеблагая Владычице, Яже Преблагаго Бога плотию рождши, озлобленное страстьми мое сердце очисти, да верою и любовию величаю Тя.

 

Песнь 3

Ирмос: В начале Небеса / всесильным Словом Твоим утверждей Господи Спасе, / и Вседетельным и Божиим Духом, / всю силу их, / на недвижимем мя камени / исповедания Твоего утверди.

 Самтавро возвеличися при обретении мощей твоих, преизливающимся народом, и яко источники воскипе исцелении и чудесы твоими, Гаврииле.

Кто не подивится дару исцелений иже в тебе яви Бог, наипаче же смирению, имже яко солию вся гнилость гордыни в приходящих к тебе отъемлется.

Исполнитися моли преподобне во благих прошению моему, ибо дает тебе по молитве твоей Даяй молитву молящемуся, наипаче же да утвердится в Господе сердце мое.

Богородичен: Явися чрево Твое Всенепорочная, стог честнаго гумна, миру нося Пшеницу живота, питающу всяческая. Темже тя яко виновну всех добрых, вернии по достоянию ублажаем[1].

 

Ин:

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

От младенчества был еси образом смирения и далече от всякия детския беспечности, в возраст же придя, восхоте Богу послужити, отринул еси плотския попечения, иноческия жизни желая.

Восхоте погубити тя льстивный зверь, сущу ти во отрочестве, во откровении необычайнем боря тя, ты же не устрашился еси свирепства его и возможе со Христом угасити силу его. Темже и ныне избави нас от напастей льстиваго.

От дома отеческаго отреклся еси, был еси в нем нищ и чуждь, и любовию Христовою укрепляемый, взял еси крест и послужил еси Господу.

Егда страна наша богоборчества исполнися, ты исполнися горним желанием и нача строити неустанно обитель Божию, юже трижды богоборцы разрушаху. Ты же помощию Божиею краснее устроял еси ю.

Богородичен: Услыша Ева праматерь: в печалех родиши чада. Ты же, Чистая Дево, услышавши: Господь с Тобою, радуйся: радованным гласом печаль праматере потребила еси.

 

Седален, глас 5, от грузинскаго последования:

Радуйся, преподобне Гаврииле, умертвивый плотския страсти и девство возлюбивый, чистотою убеливыйся и яко горлица смирением подчинивый Христу разум свой, радосте наша отче Гаврииле, любовию ко всем божественною яко венцем украшенный, темже хвалим тя и любовию воспеваем ти пение сие.

Слава и ныне:

Богородичен: Напоитися богатно слезами даждь браздам страстныя моея души, и плод принести ми сторичный, Владычице, сподоби, и сердце мое всякаго веселия исполни, да славлю Тя[2].

 

Песнь 4

Ирмос: Отча недра не оставль, / и сошед на землю, Христе Боже, / тайну услышах / смотрения Твоего, / и прославих Тя, Едине Человеколюбче.

Злии людие безбожнии тя безумным нарекоша, забыв давидское слово «Рече безумен несть Бог», ты же отче сие безумие обличив, насаждаше в земли Божий разум.

Егда обрел еси преподобне бисер Евангелия, вся продал еси да его приобрящеши: покой, имения, время и силы твоя. Темже моли Господа насадити в нас Свой разум.

Многотепле почита отче лик Спасов, не токмо на досцех написанный, но наипаче в  душах людей образ Божий потемнелый расчищая светле.

Богородичен: Лик твой прекрасен и любве исполнен быв, сие бо даде тебе Господь поелику и ты лики Его и Богоматере от поругания спасал еси, со сквернавищ их в церковь собирая.

 

Ин:

Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

Великия нечестия и гонения учиниша богоборцы над церквами и верующими, и мнози от жизни иноческия отрешишася, ты же избрал еси узкий и тернистый путь и не колебляся исповедовал еси правое исповедание.

Егда безбожие умножися, веледушно претерпел еси иссякание любве, со смирением принимая поношение, аще и возрастом юн бе, обаче мужем мудрым являшеся.

Священства саном облекся, проповедовал еси пречистую веру Христову и, просвещая народ свой, увязший в пропасти язычества, учил еси его заповедям божественнаго учения.

Благий рабе и верный, и делателю винограда Христова, с бодростию претерпе тяготу дне и умножи талант свой, сего ради и причтен еси с юродивыми всеми к радости блаженства Божия.

Богородичен: Ты еси, Пречистая Богородице, прибежище наше и утверждение, моли Сына Твоего и Бога нашего подати нам спасение и грехов оставление.

 

Песнь 5

Ирмос: Нощь не светла неверным Христе, / верным же просвещение в сладости словес Твоих. / Сего ради к Тебе утренюю, / и воспеваю Твое Божество.

Илии Фесвитянину подобник быв, ревнуя поревнова о Бозе Вседержителе, и пламенне проповедал еси Евангелие.

Воссия нам от земли сокровище, преподобне, мощи твоя, яже радостию облобызающе, молим, осияй ны, отче, любовию твоею и озаритися сердцам нашим моли любовию к ближним.

Ищущим Света среди нощи неведения явися звезда ты, отче Гаврииле, руководствуя к Солнцу Невечернему и наставляя милостыни елеем освещати сердца.

Богородичен: Ныне время благоприятно, ныне день спасения: возжзи в нас, Пречистая, огнь решимости творити заповеди Сына Твоего.

 

Ин:

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Служение твари, а не Творцу всяческих возмути тя, отче, ты же всем сердцем любя Христа, не возможе терпети осквернения имени Его и восста противу богоборцев, сжег идольский образ богоненавистника.

Ни мучения, ни страх смертный возможе тя разлучити от любве Божия, язвами бо бесчисленными покрылся еси и яко злато в горниле очистил еси душу свою во испытаниях тяжцых.

Просиял еси во Иверии, блаженне отче Гаврииле, и обличая зло юродством своим, обращал еси многих к Солнцу Правды, тем разрушая дела тьмы началозлобного врага.

Богородичен: Бога, Егоже родила еси, Пречистая Марие, моли, рабом Твоим подати прегрешений оставление.

 

Песнь 6

Ирмос: Плавающаго в молве / житейских попечений, / с кораблем потопляема грехи, / и душетленному зверю приметаема, / яко Иона, Христе, вопию Ти: / из смертоносныя глубины возведи мя.

Овцы заблуждшия Христу Доброму Пастырю возвращая, сам яко агнец кроток, помыслы твоя яко овцы добре паствил еси, молитвою утучняя и в жертву Владыце принося.

Гавриилу Афонскому подражая исшел еси превышеестественне по водам непостоянным монашеского жития, за образом Марии Девы устремився, и силою Божиею чудесно образ ея смирения в сердце твое принес.

Рукама своима храм Богу воздвигл еси, отче, иже не возмогоша безбожнии разорити; ты же был еси столп Христовой Церкви, яже адовыми враты вовек неодолима пребывает.

Богородичен: Афонскаго жребия не оставляеши, Богомати, паки же Иверия имать Тя помощницу, но и нашу нищету посети, новый удел Твой, люди чтущия тя тепле.

 

Ин:

Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Иже безумно тя погубити желаху, ничесоже сотворити можаху, яко Господь, стена верным, от смерти тя укры, и безбожных поругания не возмогоша поколебати несокрушимую волю твою.

Попечением Патриарха свободу паче чаяния обретши, хвалы и молитвы Господеви вознося, к службе в Сиони возвратился еси. Обаче и тамо отторгну тя враг от служения Господеви желанием властителей безбожных, и нищ бе, без пристанища многия лета пребыл еси, посреде плит могильных, терпя зной непосильный и хлад смертельный.

Прославим верою и любовию преподобного Гавриила, духовного отца народа Иверскаго, и с кротостию припадем к нему, молящи даровати нам покаяние и исправление.

Богородичен: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.

 

Кондак (Глас 4, от грузинскаго последования)

Непостижима есть милость Божия, / Егоже благодатию создание обожено лицезреем вси, / ты бо, преподобне отче, / образ Творца в себе утвердил еси, / вознесши естество свое в подобие Божие, / темже славим тя, отче Гаврииле, достойне похвалы, / яко был еси на земли гласом правды и голубем чистоты, / жительствовавши же в чудном смирении, / звенел еси лирою мудрости и любви органом, / ныне же на небесех предстательствуеши о спасении нашем, // ходатаю Божия благодати.

Икос

Кия песни принесем ти от недостойных уст, преподобне Гаврииле, разве ангелорадныя, како воспоем жестокое твое житие, имже яко злато в горниле просветился еси, обаче зовем сице: Радуйся, милосердне душ врачу, радуйся молитве непрестанней учителю; Радуйся мучеником за Христа сродниче, радуйся юродивым ради Христа брате; Радуйся преподобне Гаврииле, Иверии похвало и радование.

 

Песнь 7

Ирмос: Пещь отроцы огнепальну древле росоточащу показаша, / Единаго Бога воспевающе и глаголюще: / превозносимый отцев Бог / и препрославлен.

Душею сокрушенною и духом смиренным пред Господем ходив, Гаврииле, обрел еси благодать, и ныне молися Владыце, да посрамятся вси являющии рабом Его злая.

Еще в юности претекл еси тщательно, яко пчела, цветники словесныя обителей Иверских, преподобне, сладкий мед добродетели собирая и в сердечныя соты влагая[3].

На гору Сион взыде благовествуяй и окрестным странам проповедуяй: возвратитеся ко Отцу Небесному, людие, и возопийте «Благословен Бог отец наших».

Богородичен: Ангел сохрани три отроки в пещи халдейстей, ты же, Богомати, певцы твоя сохрани невреждены в горниле искушений, да поем «Благословен Бог отец наших».

 

Ин:

Ирмос: Росодательну убо пещь содела ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Зря твою ревность к служению Богови, Патриарх Ефрем пригласи тя паки ко алтарю, и, приобщив тя Тайн Христовых, во святую обитель Самтавро посла тя, идеже ты, жителю Нового Иерусалима, в малей келии у куста купины Святыя Нины, Просветительницы всея Грузии, поселился еси, и со трепетом приношению Жертвы бескровныя и проповеди Царствия паки отдался еси.

Перейдя в башню Царя Мириана, благоукрасил еси ю спасенными крестами и иконами твоими, чудотворениями вразумляя монахинь и паству, указуя им врагов невидимых, обучая их непрестанным молениям.

Возложив на плечи своя подвиг юродства и старчества Христа ради, мудре отче наш, непщеван был еси безумен быти и поругания от священства и народа приял еси. Ныне же еси Святей Церкве Иверстей сокровище и благодать на спасение верующих, похваляющих дела Твоя.

Изумляют бесчисленные дивнотворения Твои, преподобне Гаврииле, но паче изумляет исповедание Твое и любовь к Богу и ближнему, ибо в пору безбожия достигл еси смысла учений Божиих и был еси дом Богу желанен.

Богородичен: Богородице Дево, рождшая Слово паче слова, Зиждителя Твоего, Того моли с преподобным Гавриилом, помиловати души наша. 

 

Песнь 8

Ирмос: Неопальная огню / в Синаи причащшаяся / Купина, Бога яви / медленоязычному и гугнивому Моисеови, / и отроки ревность Божия / три непреборимыя / во огни певцы показа: / вся дела Господня Господа пойте, / и превозносите во вся веки.

Пламень сластей воздержанием оросил еси, и в пещь скорбей восшел еси мужественне, сего ради и в сердце очищеннем распалаем был еси любовию к Богу и людем, преподобне.

Орли криле быша ти пост и молитва, имиже над долинами страстей воспарил еси, на высоте богомыслия гнездо ума твоего свив, и ныне нас настави горняя мудрствовати, а не земная.

Источник милости подаеши, Спасе, чрез твоего угодника, и мы благодарно Тебе вопием: «Благословен еси, Утешителю Боже».

Богородичен: Воистину ангелоподобен явися ты, отче, представая в нужде сущим и милостыни обильно проливая, да вси согласно вопиют «Благословен еси, Боже, Богородицею помилуй нас».

 

Ин:

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Будучи выну в скорбех, блаженне, и в непрестанней памяти Страшного Суда, слезами омывался еси и подобно первоотцам оплакивал еси еще при жизни временней себе самаго.

Венцем хвалений увязем старца Гавриила, вретищем юродства облекшагося и сим благодати свет покрывавшего, ходатая всех и пособника, и скорбящим скорое утешение.

Паче солнца воссия слово твое, отче Гаврииле, егда проповедовал еси веру истинную, и рассея тучи греховныя, всели в нас радость светлую, мы же, ведая дела твоя, преподобне, и ныне в скорбех и напастех суще, просим помощи твоея.

Богородичен: Спасения Ходатаица нам явилася еси, Богородице, рождшая Спаса и Владыку всех: темже молим Тя, спасения сподоби всех песнословящих Тя верно во вся веки.

 

Песнь 9

Ирмос: Нетления искушением рождшая, / и всехитрецу Слову плоть взаимодавшая, / Мати неискусомужная Дево Богородице, / Приятелище Нестерпимаго, / Село Невместимаго Зиждителя Твоего, / Тя величаем.

Един хитон Христов нешвенный, сверху из многих язык истканный – эллинскаго, иверскаго и славянских – раздрати волцы хищницы тщатся, но ты отче ходатайством твоим тщи их труды соделай, во единомыслии всех сохраняя.

Российстей земли ходатай буди, отче Гаврииле, моли всеблагаго Бога сохранитися ей от враг ненаветней, и древо веры укрепити, да под сению его вси вернии укрыются.

Нам чтущим тя и любовию хвалящим помогай, преподобне, да и в жизни сей благодаряще Бога пребудем, и жизнь оную безпечальную обрящем.

Изыдите, вернии, из домов и уединений своих, в церкви собранием почтим во уединении среди многолюдства подвизавшагося, истиннаго инока и всем нам теплаго молитвенника.

Богородичен: Христе Всецарю, предстательством Твоея Матери и преподобнаго Гавриила, милостив буди ми, песнь сию чрез них Тебе принесшему.

 

Ин:

Ирмос: Бога человеком невозможно видети, на Негоже не смеют чини ангельстии взирати: Тобою же, Всечистая, явися человеком Слово воплощено: Егоже величающе, с небесными вои Тя ублажаем.

Недугом тяжким объят был еси, преподобне, и твердо терпел еси боли нестерпимыя; прозрев же в Дусе час кончины твоея, отче святый, пред иконою святителя Николая Чудотворца о благословении народа и Отечества твоего помолився, тихо мир сей оставил еси.

Восхвалим днесь православных Иверских предводителя, столпа добродетели, преподобнаго и Христа ради юродиваго Гавриила, супротив коего воздвигнутые козни вражии Христос  низложи, Имеяй велию милость.

Приидите воспразднуем память преподобного Гавриила, пламенного молитвенника, заступника нерадивых и в опасности сущих, егоже молитвами Боже помилуй нас.

Богородичен: Единаго от Святыя Троицы, Слова и Сына родила еси, Дево Пречистая, Егоже с преподобными и праведными моли о рабех Твоих, верою просящих грехов прощения.

 

Светилен

Светильник новый поставлен на свещнице, / преподобный Гавриил, егоже зряще / прославим Бога, тако сотворша человеки, / малым чим от ангел умаленных: / добродетелей молниями блещущих, / милостыни сокровищем богатых, / огневидне на угождение Ему стремящихся, и воззовем: / поминай нас, отче преподобне.

Ин светилен, от грузинскаго последования

Подобен: Жены, услышите:

Никогдаже предан был еси, честный отче наш Гаврииле, отдохновению и увеселению, но всегда облечен в молитву и бдение и на ложе твердом почивая,  множеством трудов твоих выну помнил еси о Страшном Суде при Втором Пришествии, со страхом остерегал еси душу свою ото зла и паки и паки величал еси мироздания Творца.

Слава, и ныне, Богородичен:

Великому Гавриилу Архангелу подражая, приносил еси, отче Гаврииле, ангелокрасную песнь Богоматери: Радуйся, обрадованная; и мы ныне сликовствующе поем: Благословенная, Господь Силам с Тобою.

 

На хвалитех стихиры, глас 4:

Лозу пречудную израсти земля Иверская, / процвет без числа боголюбезныя гроздия святых человек: / Нино, Тамару, Шио, Мириана и иных, / с нимиже причтеся и Гавриил Самтаврийский, / безумен миру и мудр Богу, / нищ тленными и богат вечными, / прост монах и патриархом советник, / егоже ныне просим // молитися за ны ко Господу.

Надеяся на Господа, яко гора Сион / был еси, преподобне Гаврииле: / не подвижися мыслию живый во Иерусалиме, / горы окрест тебе быша, / и вопиял еси унывающим: / «Господь окрест людей Своих // отныне и до века».

Витязю Христова воинства, / исповедниче веры и крестоносче, / за Христа мучения и биения / пивый яко питие бессмертия, / от сего смирения исполненный, / укрепи на тесном пути / путники христианы.

Милостыни сосуде преизливающийся, / отче Гаврииле Самтаврийский, / приими молитвы чтущих тя // и не премолчи за ны Господу.

Слава, глас 6:

Осени сей радостный день приспе, / память Гавриила исповедника, / плодов добродетели исполнена, / егоже просим подати скорбящим мир, / больным исцеление / и всем нам насытитися // пищи небесныя.

И ныне, глас тойже, Богородичен от меньших:

Архангельское слово прияла еси, / и херувимский престол показалася еси, / и на объятиях Твоих носила еси, Богородице, / Надежду душ наших.